ပၢင်တိုၵ်းမိူင်းၶၢင်ႁၢဝ်ႈႁႅင်း သိုပ်ႇလၢမ်းၵႂႃႇလၢႆတီႈလၢႆငွၼ်ႈ

ပၢင်တိုၵ်းၼႂ်းမိူင်းၶၢင် ဢၼ်တႄႇႁၢဝ်ႈႁႅင်းမႃးမိူဝ်ႈၼႂ်း လိူၼ်ၻီႊသႅမ်ႊၿိူဝ်ႊ (2013) ၼၼ်ႉ ယၢမ်းလဵဝ်ၽႄႈ လၢမ်းၵႂႃႇလၢႆလၢႆတီႈၼႂ်းမိူင်းၶၢင်။ ၼႃႈလိၼ် ဢၼ်ဢမ်ႇ ယၢမ်ႈပဵၼ်ပၢင်တိုၵ်းၵေႃႈပဵၼ်မႃး၊ ၵွပ်ႈမၢၼ်ႈထႅမ်ႁႅင်း သိုၵ်းၶဝ်ႈမိူင်းၶၢင်ဢမ်ႇထၢတ်ႇ။

သိုၵ်းၶၢင် KIA ၼႃႈလိၼ်သိုၵ်းမိူင်းၶၢင်

ဢိင်ၼိူဝ်တပ်ႉသိုၵ်းမၢၼ်ႈ သူင်ႇႁႅင်းသိုၵ်းၶဝ်ႈၽိူမ်ႉထႅမ်တႅဝ်းၼႃႈ သိုၵ်းၼႂ်းမိူင်းၶၢင်ဢမ်ႇထၢတ်ႇသေ ၼႂ်းၼႃႈလိၼ်ၵုမ်းၵမ် ၶွင်တပ်ႉသိုၵ်းၶၢင် (KIA) ဢၼ်ဢမ်ႇယၢမ်ႈပဵၼ်ပၢင်တိုၵ်းၵေႃႈ မိူဝ်ႈလဵဝ်ပဵၼ်မႃးလၢႆလၢႆတီႈ၊ မိူၼ်ၼင်ႇၾင်ႇၾၢႆႇတူၵ်း ၼမ်ႉၵဵဝ် ၼႂ်းတိူင်းၸႄႈၵႅင်ႇ (ၸၵၢႆး) ပွတ်းၼိူဝ် ဢၼ်တိတ်းၸပ်းၵၼ် တင်းမိူင်းၶၢင်ၵေႃႈ ပဵၼ်ပၢင်တိုၵ်းၵၼ်- ၵူၼ်းၼႂ်းပိုၼ်ႉတီႈၵေႃႉၼိုင်ႈလၢတ်ႈ။

ၵဵဝ်ႇၵပ်းလွင်ႈၼႆႉ ၵူၼ်းၼႂ်းပိုၼ်ႉတီႈဝဵင်းမၢၼ်ႈမေႃႇ (ပမေႃႇ) ၵေႃႉၼိုင်ႈလၢတ်ႈဝႃႈ- မိူဝ်ႈဝႃးယၢမ်းၵၢင်ၼႂ် ပဵၼ်ပၢင်တိုၵ်း တီႈၼႂ်းၵႄႈသူၺ်ႇၵူႇ တင်းမူဝ်းတႃး။ ထိုင်မႃးယၢမ်းဝၢႆးဝၼ်း 4 မူင်းၶိုင်ႈသမ်ႉ မၢၵ်ႇတႅၵ်ႇတီႈႁိမ်း ၸၼ်ႉၸွမ်ၶွမ်ႊၽိဝ်ႊ တိူဝ်ႊဝဵင်းမၢၼ်ႈမေႃႇ၊ ႁဵတ်းႁႂ်ႈၵူၼ်းႁေႃႈလူတ်ႉ 3 လေႃႉ ၵေႃႉၼိုင်ႈတိူဝ်ႉဝၢတ်ႇၸဵပ်း- ဝႃႈၼႆ။ (လွင်ႈၼႆႉ ၸုမ်းၶၢဝ်ႇၽူႈ တွႆႇႁွၵ်ႈယင်းပႆႇလႆႈႁူဝ်ယွႆႈမၼ်းတႅတ်ႈတေႃး)။

ၵဵဝ်ႇၵပ်းလွင်ႈပဵၼ်ပၢင်တိုၵ်းၼႂ်းမိူင်းၶၢင်ၼႆႉ ဢူးဢွင်ႇၵျေႃႇၸေႃး (ၽူႈပၵ်းတႃ/လူင်ႉလႅၼ်ႇ/ထတ်းသၢင်ၵၢၼ်မိူင်းၵၢၼ်သိုၵ်း မိူင်းမၢၼ်ႈ) လၢတ်ႈဝႃႈ- သိုၵ်းမၢၼ်ႈသူင်ႇႁႅင်းသိုၵ်းၶဝ်ႈၼႂ်းၼႃႈလိၼ်ၶၢင် ၸုမ်းၼိုင်ႈယဝ်ႉၸုမ်းၼိုင်ႈ၊ ဢဵၼ်ႁႅင်းသိုၵ်းမၢၼ်ႈ ၵေႃႈၼမ်မႃးလိူဝ်ၵဝ်ႇ။ ပေႃးတူၺ်း ဢၼ်သိုၵ်းမၢၼ်ႈထႅမ်ႁႅင်းသိုၵ်းမႃး လၢႆၸုပ်ႈၸိူဝ်းၼႆႉ တႃႇပၢင်တိုၵ်းတေၵိုတ်းဢမ်ႇ ပဵၼ်လႆႈ။ မိူဝ်ႈပူၼ်ႉမႃး 5 ဝၼ်းၼၼ်ႉၵေႃႈ သိုၵ်းမၢၼ်ႈ သူင်ႇႁႅင်းသိုၵ်း လုၵ်ႉတီႈတိူင်းသိုၵ်းၸဵင်ႇၸၢၼ်းဝၼ်းတူၵ်း (ၼတၶ) သေ ၶီႇႁိူဝ်းၶိုၼ်ႈၸွမ်းၼမ်ႉၵဵဝ်၊ တပ်ႉၸုမ်းလူင် (တပ်ႉမ) 77 ၵေႃႈႁွတ်ႈဝႆႉပွတ်းတွၼ်ႈၼၼ်ႉ။ သိုၵ်းမၢၼ်ႈၼႆႉ လႅပ်ႈဝၢင်းၽႅၼ်ဝႆႉ ဝၼ်းလိုၼ်းသုတ်း ဢၢၼ်းတိုၵ်းဢဝ်လၢႆႇၸႃႇႁႂ်ႈလႆႈ ၼႂ်းဝၼ်းထိ 20/01/13 ၼႆႉ - ဝႃႈၼႆ။

ဢိင်ၼိူဝ်ပၢင်တိုၵ်းႁၢဝ်ႈႁႅင်းမႃးသေ ဝၼ်းထိ 17/01/13 မိူဝ်ႈဝႃးၼႆႉ ႁိမ်းႁွမ်းသဵၼ်ႈတၢင်းၵႃး ဝူင်ႈၵၢင်မိူင်းၶႄႇ-မိူင်းမၢၼ်ႈမေႃႇ-လွႆၸႄႈ ၸိူဝ်းၼႆႉၵေႃႈသိုပ်ႇပဵၼ်ပၢင်တိုၵ်းထႅင်ႈ- ၵူၼ်းလွႆၸႄႈၵေႃႉၼိုင်ႈလၢတ်ႈၼင်ႇၼႆ။

သိုပ်ႇလၢတ်ႈထႅင်ႈဝႃႈ- မိူဝ်ႈဝႃးၼႆႉ တီႈႁိမ်း ၸဵင်ႇလူင်ႇၵပႃႇ သဝ်လၵ်းမၢႆ 24  ၵေႃႈ ယိုဝ်းၵၼ်တင်းဝၼ်း၊ သဵင်ၵွင်ႈတႅၵ်ႇ တင်းဝၼ်း၊ လူတ်ႉၵႃး လူတ်ႉၶိူင်ႈၸိူဝ်းၼႆႉ ဢမ်ႇၵႂႃႇမႃးလႆႈ။ မိူဝ်ႈၼႆႉတႄႉ လူတ်ႉၵႃးၵႂႃႇမႃးလႆႈယူႇ၊ ႁၢၼ်ႉၶၢႆတၢင်းၵိၼ် ဢၼ်မီးတီႈ 28 လၵ်းၼၼ်ႉၵေႃႈ ယွၼ်ႉပိူဝ်ႈပဵၼ်ပၢင်တိုၵ်းသေ သိုၵ်းမၢၼ်ႈ ၸႂ်ႉပိတ်းဢိုတ်းပႅတ်ႈယဝ်ႉ- ဝႃႈၼႆ။

တီႈ လဝႃးယၢၼ်ႇ ဢၼ်ယၢၼ်ငဝ်ႈငုၼ်း KIO/KIA လၢႆႇၸႃႇ 7 လၵ်းၵေႃႈ ပဵၼ်ပၢင်တိုၵ်းတင်ႈတႄႇ မိူဝ်ႈဝႃးမႃးတေႃႇ ထိုင်မိူဝ်ႈၼႆႉ ယင်းတိုၵ်ႉယိုဝ်းၵၼ်ယူႇ၊ မီးလွင်ႈတူၵ်းဝၢတ်ႇၸဵပ်းလူမ်ႉတၢႆတင်းသွင်ၾၢႆႇ- သိုၵ်းလုၵ်ႈ ႁဵၼ်း ABSDF ၵေႃႉၼိုင်ႈလၢတ်ႈ။

ၽွင်းယၢမ်းသိုၵ်းမၢၼ်ႈတင်းသိုၵ်းၶၢင် ပဵၼ်ပၢင်တိုၵ်းၵၼ်ႁၢဝ်ႈႁႅင်းယူႇၼႆႉ သဵၼ်ႈတၢင်းၵၢၼ်ၵႃႉၶၢႆၼႂ်းၸိုင်ႈတႆး ပွတ်းႁွင်ႇ မူႇၸႄႈ-ဝဵင်းလိူဝ်ႇ (မၼ်းတလေး) ၵေႃႈ ၵွပ်ႈၸဝ်ႈၼႃႈတီႈလူင်ပွင်ၸိုင်ႈမၢၼ်ႈ ၵူတ်ႇထတ်းႁၢဝ်ႈႁႅင်း လႄႈႁဵတ်းႁႂ်ႈလူတ်ႉ ၵႃးၵႂႃႇမႃး ၶၢင်ႉၶမ်ၸွမ်းတႃႈၸွမ်းတၢင်း၊ ဢမ်ႇလႆႈၵႂႃႇငၢႆႈမႃးလူမ်- ၼႆယဝ်ႉ။

Source: www.Panglong.rog